《街頭魔法王》DSE通識杯麵—考試備忘2015

各位DSE考生，聽日考通識，唔好理亞視住喇。基本上通識都唔係靠最後一日背嘢，不過大家最好重溫一下2014年香港、中國、世界發生過咩大事，可能有一樣半樣會出。

留意啲2014大事之餘，記得留意呢啲新聞有咩相關概念，唔記得個概念講咩就睇番參考書或者Google一下。

你可能會問，2014發生過咩事？相關概念係咩？

參考雅虎香港嘅2014十大新聞，是咁的：

十大香港新聞

雨傘運動：個人成長、社會政治參與、法治、生活素質、身份認同
iPhone 6上市：個人成長、全球化
麥當勞用福喜過期食品事件：食品安全、全球化
九龍灣啟晴邨槍殺案：可以skip
新界東北發展計劃爭議：社會政治參與、法治、生活素質、身份認同、食品安全、可持續發展
三堆一爐提案爭議：可持續發展、環境科技
港鐵高鐵工程延期：可持續發展、生活素質
港400食肆捲入台灣地溝油案：食品安全、全球化
香港電視開台：社會政治參與、法治、生活素質
劉進圖遇襲：新聞自由、社會政治參與、法治、生活素質

十大世界新聞

馬航客機失蹤及連串空難：可以Skip
伊波拉病毒爆發：公共衛生相關的國際合作
蘇格蘭獨立公投：可以Skip
烏克蘭克里米亞危機：全球化
2014世界盃：全球化
冰桶挑戰熱潮：全球化
台北捷運隨機斬人事件：可以Skip
台灣高雄煤氣爆炸：可以Skip
韓國世越號客輪翻沉事故：可以Skip
伊斯蘭國武裝份子：綜合國力、全球化
雅虎冇十大中國新聞，2014年中國不外乎係反貪、國家形象問題、一孩政策、航母與軟硬實力、污染問題。

另外，考通識必須注意幾件事：

1. 抖足精神：今晚正常時間瞓，抖足精神，精神唔夠一定唔掂。

2. 注意時間：嚴格尊守時間紀律，唔好花太多時間響某一題，然後做唔晒。

3. 取易不取難：卷二題目，如果係覺得有可能中伏嘅題目就千祈唔好揀，寧願揀最大路最淺嘅一題。

4. 熟習題型：今晚最好再溫一溫所有題型要用咩格式嚟答，例如「多大程度」題如何做立論同駁論、資料題點樣描述數據等等。十幾種常見題型你應該熟習晒架喇，唔好話我知你冇睇過任何教題型嘅作業或者參考書呀。

總之，早啲休息，平安心入場，俾心機答好每一條題目就已經好好架喇。祝大家考試順利，聽日雖然係愚人節，但祝大家唔會有應節嘅感覺啦。